PRESS RELEASE: SIPMIU BAWLHHLAWH PAIH MOTOR CHUNGCHANG

DIPR:https://dipr.mizoram.gov.in/press-release/sipmiu-bawlhhlawh-paih-motor-chungchang

Download : Bawlhhlawh Paih Motor chungchang Documents

SIPMIU in bawlhhlawh paih motor (garbage vehicle) lei nan tender chhuahin, tender document a Motor/ Vehicle specifications hi huam zau tak (Standard Specifications) a siam a ni a, eng motor/ vehicle manufacturer tan pawha chhan ve theih tura duan a ni. Chutih lai chuan he Motor supply tur hi chuan a hmain bawlhhlawh paih motor (garbage vehicle), a bik takin bawlhhlawh phurh nana a body siam (tender drawing ami ang), an lo supply tawh thin tur a ni tih qualification criteria-ah dah a ni. SIPMIU in bawlhhlawh motor leina tur atan a tender a chhuah pawh hi motor vehicle siamtu hrang mi pahnih (2) in an chhang a, chungte chu M/s Zothan Auto Works, Aizawl (TATA Motors) –M/s TPS Infrastructure Ltd., New Delhi (Joint Venture) leh M/s SML Isuzu, Chandigarh te an ni. A chhangtu pahnih (2) zingah hian M/s Zothan Autoworks, Aizawl, Chanmari-M/s TPS Infrastructure Ltd., New Delhi (Joint Venture) chhanna chauh a nung a, M/s SML Isuzu, Chandigarh chhanna erawh hi chu bawlhhlawh paih motor (garbage vehicle), a bik taka bawlhhlawh phurhna tur ang an la siam ngai loh leh an supply ngai loh avangin, a chhanna hi a tling zo ta lo a ni. M/s TPS Infrastructure hi chuan heng Bawlhhlawh phur motor ang te hi India ram hmun hrang hrangah an lo supply tawh thin avangin M/s Zothan Autoworks, Aizawl, Chanmari-M/s TPS Infrastructure Ltd., New Delhi (Joint Venture) tender chhanna hi pawm a ni ta a ni.

Bawlhhlawh paihna tur motor lei nana thlan M/s Zothan Autoworks, Aizawl, Chanmari- M/s TPS Infrastructure Ltd., New Delhi (JV) te chhanna man zat chu motor pakhat (1) ah Rs. 18,90,000/- (including tax and 3 years warranty) a ni. Garbage vehicle (a body a bik taka siam/ customized body) hi a carrying capacity chu 3.5 cum a ni. Garbage vehicle TATA 407 LPK 3.5 cum leh TATA 407 LPK 3 cum vehicle pangai man nena khaikhin chi a ni lova . LPK 407 pangngai a tlawm zawk chhan te chu:

1.Garbage Vehicle LPK 407 carrying capacity hi 3.5 cum a nih laiin LPK 407 pangngai carrying capacity chu 3 cum chauh a ni.

2.Garbage Vehicle PTO hydraulic pump hi LPK 407 vehicle pangai aiin tih len a ni.

3.Garbage Vehicle-ah hian a body a len tak avangin a Chassis hi double a siam a ni.

4.Tipping cylinder leh spool valve hi a bika siam a nih vangin a to bawk.

5.Garbage vehicle body (a chung tel) hi kahpathir 4mm thickness veka siam a ni a, LPK 407 pangngai body hi 3mm thickness niin a chung khuhna a tello bawk.

North East-a bawlhhlawh motor supply tawh thin M/s Kamrup Construction Co.(P) Ltd. (Automobile Body Builders), Guwahati leh M/s Ariamrit Engineering Limited (A Govt. of India Recognised Exporter), Kolkata te supply-na rate-ah pawh pakhat (1) man hi Rs. 20,26,879/- leh Rs.26,94,300/- te a ni. Bawlhlawh motor chassis hi Mumbai, Maharashtra State atanga lak chhoh niin, M/s Zothan Autoworks, Aizawl ina a joint venture pui M/s TPS Infrastructure Ltd., New Delhi workshop-ah a body hi sak a ni.

Bawlhhlawh phur motor hring 25 leh motor pawl 25 man inan loh chhan hi a a hnuaia tarlan ang hi a ni:

1.Bawlhhlawh motor hring 3.5 cum capacity a siam chu Aizawl a lo thlen hnuin bawlhhlawh tam zawk a phurh theih nan motor body hi tidanglam duhna Aizawl Municipal Corporation leh Sorkar hotute atanga a awm avangin siam danglam leh a ni ta a. Hei hi company hmunpuia tih a nih tawh loh avangin Aizawlah bungrua chah chawp a nih avangin phai company rate aiin a to phah ta a ni.

2.Motor hring 25 hi Aizawl-ah sak len a ni a, motor pawl 25 erawh hi chu New Delhi-ah sak len a ni thung. A hring 25 hi 3.5 cum capacity-a sak danglam hnuah Aizawl a lo thlen tawh si avangin Aizawl-ah 8 cum capacity-a sak len a ni ta a, a pawl erawh chu New Delhi ah 8 cum capacity-a sak len tir a ni.

3.Motor hring 25 sak belhna man a to bik nachhan chu a body zawm belhna hmanrua hi plain sheet ni lovin kahpathir 4mm a chhah chi chauha siam a ni. Kahpathir 4mm a chhah hi Aizawl-ah lei mai tur a awmloh avangin Kolkata-ah chah chawp niin, a siam man pawh New Delhi ai chuan a to zawk a ni.

4.Motor pawl 25 sak belhna man hi cheng 24,47,250/- niin, motor hring 25 sak belhna man hi cheng 58,25,000/- a ni.

407 LPK garbage vehicle pakhat (1) contract rate hi cheng 18,90,000/- a ni a, a pawl 25 body sak belh hnuah pakhat man hi cheng 19,87,890/- a ni ta a ni. A hring 25 ve thung hi pakhat man chu cheng 21,23,000/- a ni. Bawlhlawh motor phurh theih zat pawh 3.5 cum atangin 8 cum ah siam chhuah a ni ta a ni. Garbage vehicle North East a lo supply tawh thintu M/s Kamrup Construction CO. (p) Ltd., Guwahati te leh M/s Ariamrit Engineering Ltd., Kolkata ten 3.5 cum capacity an supply-na rate Rs. 20,26,879/- leh Rs.26,94,300/- te ai chuan SIPMIU, Aizawl-in 8 cum capacity garbage vehicle a lei hi a tlawm zawk a ni.

SIPMIU motor leina hi ADB Programme NERCCDIP hnuaia mi a ni a. He Programme ah hian Contract Package ho reng reng Ministry of Urban Development, Govt. of India leh Asian Development Bank ina an pawmpui hnuah chauh tihfel thin a ni a. Chuvangin heng motor leina ah pawh hian chutiang zela kalpui a ni bawk a ni. Chuvangin SIPMIU ina bawlhhlawh motor a leina hi motor dang man nena khaikhina to uchuak anga sawi hi hriat sual palh niin a lang a ni.