AIZAWL WATER SUPPLY – A tobul a chhuiin

Sap lo awm hmasaten Aijal an tih kha tunah chuan Aizawl ti hian kan hre tlanglawn berin sawrkar lam pawhin Aizawl tih hming hi hman vek a lo ni ta. He Aizawl khawpuia mi cheng te kha veng hrang nei pawhin an awm vak lo a niang. Aijal kulh an tih pawhin a huam chin chu tuna Babutlang leh High School tlang vel hi ni maiin a hriat. Zawi zawiin mi cheng an lo pung ve a, sipai hmun pawh tuna AR Ground awmna velah hian an zau ve a, a hnuah Bawrhsap in(Raj Bhawan) leh Tuikhuah te kan neiin Venghlui leh Thakthing(Rahsi Veng),Khasi Veng leh Kulikawn te a lo awm chho ta nia hriat a ni. Mizovin Manding Sap Putara an tih Col.G.H.Loch-a kha kum 1900 hma lawk atang khan Gurkha Rifles hotupa atan rawn dah a ni a. A ni khan tuna AR Ground,(Lammual) kan tih laih hna hi a rawn thawkin vawiin thlenga kan hmuh theih Quarters-guard te hi rawn sain khawpui chei hna ropui tak mai a rawn thawk a. Tuikhuahtlang tuikhuah pawh hi ruahtui dawh khawla thallaia mi pawimawhhote hman atan 1900 kum khan laih a niin Khasi lungchher thiamte hmangin a tuikhuah bang vel hi a ruahmanna anga siam a ni an ti.He tuikhuah hi kum 100 chuang a nih hnuah pawh la hman tangkai zui a la ni reng a ni. Tin, he tuikhuah zau zawng hi feet 113.5 bial, feet 15-a thuk a niin tui gallon 12,00,000 zet a dawng a; a velin ruahtui dawnthleng atan rangva feet 100 vel laia zauvin dawh kual a ni bawk. Chuta ruahtui an dawh khawl chu Bawrhsap,milian leh mi pawimawh zualte’ thalah an hman theih turin pipe supply system siam a ni a. Khatih lai khan Mizote hi di in maia khawsa thin kan ni a, inchungah rangva kan la hmang ngai lova, chuvang chuan hei hi ei leh in atan ruahtui hman kan zir tanna ni ngeiin a lang.

Bawrhsap pisa leh chenna bungalow vela pangpar leh phaitualhnim, thlai leh ran chawmnan,tuna Mizoram Secretariat Annexe(Block-A) chhim lam ber hmunah te, Tennis Court leh Excise Department building thlangah hian tuikhuah lian tak tak pathum laih a ni bawk.Tuikhuah thlang ber kha a thukin hna a nei thaa Aizawl thalai leh naupang chenna ber leh hriat lar a ni a Bawrhsap Tuikhuah tia sawi thin a ni. Tin, hetah hian Hindu-ho pawhin puja apiangin an pathian lem an paih thin. Khatih hun lai khan kan khawsak a la hniamin kan chet dan pawh kha a chute vak lo a niang, vai pathian paih tur kawngzawhte kha Mizo naupang tamtakin kan zui ve a, tuikhuaha an paih pawhin an nem pil hma hmain an pathian lem lak tumin Mizo thalai leh naupang an zuangthla nuk nuk thin. Tuiin a chiah zawp hnute kha la chhuak lehin vai pathian lu leh sakeilu la chhuak tute kha kan ngaisang phian thin nia.He tuikhuah thlang lehah chuan Char-nambar (palina) an ti a, tuikhuah ni lovin lungrem tur lung lakna (quarry) a ni thung. Hei hi hun rei tak chhung chu Aizawla quarry awm chhun leh lung tha ber leh a lakna hmun tha ber a ni thin.

Kum 1954-1955 chhovah khan ruahtui dawhna bawk atan Laipuitlang chhipah tuikhuah pahnih siam leh a ni a; Heng tuikhuah laih hna hi khatih laia contract hna lian ber a tling awm e. Chhim-chhak lam deuha a lian zawk kha pu Chawnga(L),Pu Lalhmingliana(Hmingroy-a) pa thawh a ni a; a pakhat kha Pu Hrama(L),Dr. Selbuanga(L) pa thawh a ni thung.
Zawi zawiin Aizawlah mi cheng kan lo pungin khasak a lo changkang ve hret hret a, kan tui mamawh pawh pawh a lo tam tial tialin tuikhuah leh tuikhur tui ringawt chu kan lo khamkhawp ta lova. Chanmari tlak lam(Chaltlang kham hnuai)a kawr tui hna tha zet awm chu Aizawl pa neinung leh thahnemngaiten mipui mamawhna phuhru turin 1961 khan Aijal Water Supply Company tia vuah Mizorama company hriat lar hmasak ber chu an lo din ta a. Heta a puipa leh buaipuitu hriat lar deuhte chu Pu Chhawnzinga,Zarkawt,Pu Sangliana,Headmaster, MacDonald Hill, Pu Rosiama,Zarkawt,Pu Zangena,Zarkawt, Pu Zalianchhunga,Zarkawt,Pu Lalzuia,Chanmari te an ni a, mi dang ziak hmaih pawh kan nei mai thei e. Chanmari tlak lama lui chu khuapin motor-a chawiin Aizawl veng hrang hrangah hrlah chhuah theihin an lo siam ta a. A hmingah ‘Company Tuikhuah’ tite leh ‘Chhawnzinga Tuikhuah’ titea sawi thin a ni. Hun a lo kal zel a, 1969 kum khan helaia Company tuikhuah leh a vel ram hi sawrkar (tuna PHE Department lo ni chho ta) hian leiin Aizawl khawpui tui mamawha sem chhuah theih turin leh Laipuitlang tuikhuaha pump khawl hmanga tui pupm chhoh turin ruahmanna a siam a.Hei hi Aijal Emergency water Supply Scheme tih hming vuahin electric motor pump stage thum(3) bun a ni a.Amaherawhchu, khatih hunlai khan electric supply a la tha tawk lo nen a thawktu pawh thiam tawk kan awm loh avang tepawh a ni ang; khawl pathuma inhlangkai chho tur a nih bawk si avang a ni ang, Laipuitlang tuikhuah atanga sem chhuah khawp tui dah khawl kha a harsa hle mai a. Chuvangin, a tira beisei angin a hlawhtling vak lo deuh niin a lang. Tin, chutih rualin ram buai hnu khan Aizawlah mipui kan pung chak em em a, chuvangin mipui mamawh phuhru tur tui sem tur a awm hlei thei lo a ni ber mai.

Tin,1964 favang atangin Aizawl Water Supply Scheme hna thawh tan a ni a. Hetah hian Reiek kai Tlawng lui sira Serlui tui lain diesel engine 360HP-zeta lian chhawng sarih(7)-a in la lawnin Tuikhuahtlang tuikhuaha la lut tura ruahman a ni. Hetianga hna lian thawh kha khatih hun lai kha chuan a la harsa hle a ni ang; peih fel a nih hmain 1966-a rambuai khan a nang tain a thawh zawm theih a ni ta lova. Rambuai avanga kum nga(5) zet a khaihlak hnuah thawh chhunzawm leh a ni a; February,1972 khan engtin tin emaw tih puitlin a ni thei ta a ni. Mipuiin kan chhawr theih meuh chuan Aizawl mipui pawh a let chuang fe kan lo ni hman tawh a ni. Hetih hun lai pawh hian PHE Department hnuaiah mechanical lam thiam mi an awm tha lova, tin, pump khawl pasarih(7)a tui inlalawn zel tur kha pump khawl pakhat thalovah ringawt pawh a vaiin a thawk theilo a ni zel mai bawk si a, chutih rualin diesel hman tur neih a harsa bawk nen, Aizawl khawpuiin kan tui mamawhah kan hnemhnan phah lutuk chuang lo a ni ber mai. Chutiang chu a lo nih chhoh tak avangin favangah phei chuan mipui tui in tur chhawinan truck 40 dawn dawn chhawrin sawrkarin Tuirial leh Tlawng tui a chawi a lo ngai ta thin a ni.

Aizawl khawpui chawmna turin Aizawl Water Supply(Augmentation) Scheme ruahman a ni leh a. He Water Supply Scheme foundation stone hi kum 1980 khan India President Pu Sanjiva Reddy khan tuna Speaker bungalow hmun bulah khian a phum nghe nghe a ni. Heta hman tur hmanraw thenkhat pawh lei a ni a, nimahsela, Aizawla mi cheng nasa tak maia a pung chho chawm tur chuan hna runpui tan a nih hmain kawng dang ngaihtuah a lo ni leh ta zawk a. Tuna Greater Aizawl Water Supply Scheme: Phase-I hi ruahman a lo nil eh ta zawk a ni. A tirah chuan Aizawl khawpuia mi cheng Melthum, Saikhamakawn, Hlimen, Luangmual, Tanhril, Chawlhhmun,Durtlang, Sihphir, Thuampui, Zemabawk leh Rangvamual te huam lovin) mi cheng pung chho zel tur pawh chhut telin mi 1,60,000 tan ruahmanna siam a ni a. Nimahsela, Govt. of India lamin mi 80,000 tan he ruahmanna hi an lo reh bun sak ta a ni.( Hei hi a chhan fel tak sawi tur hriat ni lo mahsela, Tlawng lui atanga tui 1,080 metres laia sang Tuikhuahtlanga pump chho tur khan Mizo Engineer-te ruahmanna kha an ring ngam chiah lo pawh a ni mai thei).He Water Supply hi December,1988 khan hlawhtling taka zawh fel a lo ni tain mipuiin nasa takin kan lo chhawr tangkai ta a ni. He Water Supply hian engti taka nasain nge hmasawnna/changkanna min thlen tih pawh hi ngaihtuah tham a tling a ni. Chawlhkar khat dana inbual chauh thin tamtak kha nitin kan han inbual ve thei ta a,sapho leh vai milianho fate chauh neih theih emaw kan lo tih thin complexion tha tak tak kha kan Mizo naupang leh tleirawl/rawlthar te pawhin an lo neih theihzia a takin kan lo hmu chho ve ta a nih kha. Hriselna kawngah pawh engti taka sangin nge chawi san kan nih tak tih pawh hi ngaihtuah theih tak a ni. Kum 2007 atangin Greater Aizawl Water Supply Scheme:
Phase-II thawh zui a ni a;sum leh pai harsatna namenlo karah mipui tui mamawh zualpui chu Greater Aizawl huam chhungah (Melthum, Saikhamakawn, Hlimen, Falkawn, Luangmual, Tuivamit, Tanhril, Chawlhhmun, Durtlang, Sihphir, Thuam-pui, Falkland, Zemabawk leh Rangvamual te pawh huamin) kan lo nei ta a; hei hi Aizawl mi cheng zawng zawngin mi pakhat zelin nitin tui litres sawmsarih (70 lpcd) zel dawng thei tura ruahman ni mahsela, tun dinhmunah chuan hetiang tak hi kan la dawng phak lo niin a lang.

Tunah hian North Eastern Region Capital Cities Development Investment Programme (NERCCDIP) hnuaiah SIPMIU hian heng project awm sa thuam that hna thawkin PS Tank hlui leh tha tawh lote RCC tank-a thlakin Tui metre chhia te thlak a ni a; tunah hian Aizawl veng hrang hranga tui pekna(distribution network leh Feeding main) a thara thlakna turin system tha zawk leh hmanraw tha zawk hmangin hna a thawk mek a ni. Tin, tui pump-na atan liau liauva hman tur electric lakna tur 132 kva Sub-Station pawh buatsaih mek a ni bawk. Heng hi peih fel a nih hunah chuan hnianghnar zawkin hun engngemaw chhung chu Aizawl khawpuiin tui in tur thianghlim a nei thei phawt dawn a ni. Mihring khawsak changkang zel karah kan tui mamawhte a lo pungin India ram khawpuiah pawh mi pakhat zelin nitin tui 135 litres hi mamawh tawk nia chhutin chutiang tui nei tura hmalak thin a lo a ni ta a. Aizawlah pawh hian tuna kan tui neih hi 34 mld(million litres per day) ni thei tura ruahman nimahsela,a tak takah chuan a la tling lo niin a lang. Hetiang kawnga chhut chuan kum 2048-a Aizawl khawpuia mi cheng lo pung chho zelin tui a mamawh tur chu 88.92 mld lai a lo ni a, chuvangin tui in tur ngaihtuah hna hi thawh tur a la tam hle mai. Tunah hian SIPMIU pawh hian Tanril hnuaia Industrial Growth Centre thlanga Setlak lui leh Tlawng infinna atangin tui 37 mld laia tam lakna hna ruahman mek a niin India sawrkar laipui pawhin a pawmin survey hna thawh mek a ni a, heng bakah pawh hian tui hna hrang hrang lui leh ruahtui dawhkhawlna(rain water harvesting) hmanga tui lak hna hi buaipui zel chu a la ngai dawn a ni.